माओवादीका यी प्रभावशाली नेता प्रचण्डको विपक्षमा उभिने
फाइल फोटो
काठमाण्डु– पुष्पकमल दाहाल ‘प्रचण्ड’ नेतृत्वको वर्तमान सरकारले मधेसी दलहरुलाई मनाउ ५ नम्बर प्रदेशका पहाडी जिल्लाहरुलाई प्रदेश नम्बर ४ र ६ मा मिलाउने गरी संविधान संशोधन प्रस्ताव तयार पारेपछि त्यसको चोतर्फ विरोध भएको छ ५ नम्बर प्रदेशका गुल्मी, अर्घाखाँची र पाल्पा प्रदेश नम्बर ४ तथा प्युठान र रोल्पालाई प्रदेश नम्बर ६ मा गाभ्ने प्रस्तावको जिल्लास्थित कांग्रेस, एमाले र माओवादी नेता तथा प्रदेशसँग सम्बन्धित केन्द्रीय नेताले विरोध गरेका हुन् ।
यसरी विरोध गर्नेमा सरकारको नेतृत्वकर्ता माओवादी केन्द्रका एक शीर्ष नेतासमेत रहेका छन् । माओवादीका प्रभावशाली नेता टोपबहादुर रायमाझीले संविधान संशोधनका नाममा पहाड र तराई छुट्याउने प्रस्ताव आए त्यसको विपक्षमा मतदान गर्ने बताएका छन् ।
प्रचण्डको नाम नलिइ रायमाझीले त्यस्तो प्रस्ताव आए संसदबाट पारित हुन नसक्ने चेतावनी दिए । उनले भने, ‘संविधान संशोधन जरुरी रहेको भए पनि पहाड र तराई टुक्र्याउने पक्षमा मेरो समर्थन छैन ।’ उनले संविधान संशोधनको एजेण्डा र औचित्य स्पष्ट हुनुपर्ने उल्लेख गरे ।
‘विवादै नभएको ठाउँमा समेत विवाद सिर्जना गर्न खोजिएको छ’, एमाले युवा संघ र अखिलले बिहीबार राजधानीमा गरेको कार्यक्रममा रायमाझीले भने, ‘यस्तो तरिकाले माओवादी आफैंलाई नोक्सान हुन्छ, यस्तो गर्नु हुँदैन ।’
उनले थपे, ‘पाँच नम्बर प्रदेशका बारेमा किन चिन्ता गर्नुभएको हो ? विवाद नभएको ठाउँमा विवाद गर्दा भुईंको टिप्न खोज्दा पोल्टाको पोखिएला । मधेसवादी दल क्षेत्रीय पार्टी भन्ने अनि सबैतिरको चिन्ता नगर्नुहोस् । पहाडबाट तराई अलग गर्ने कुरा हाडमासु छुट्याए सरह हो ।’
प्रचण्डलाई असंविधान संशोधनका लागि एमालेलाई मनाउन हम्मेहम्मे परिरहेका बेला आफ्नै पार्टीको नेताबाट यस्तो चेतावनी आएको हो । मधेसी मोर्चासँग यस विषयमा कुरा मिलिसकेता पनि पार्टी भित्रबाट विरोधको आवाज उठ्न थालेपछि प्रचण्डलाई झनै तनाव थपिएको छ ।
संविधान संशोधन प्रस्ताव दर्ता गरे एमालेले नमान्ने, नगरे मधेसी मोर्चाले झस्काउने, प्रदेश टुक्राउन खोजे आफ्नै पार्टीभित्रबाट विरोध हुने र सबैलाई मिलाउन नसकिरहेका बेला प्रचण्ड ठूलो धर्म संकटमा परेका छन् । काठमाडौं टुडेबाट
No comments:
Post a Comment